نداء للمشاركة في ورشة كتيبة أدبية. الموضوع: «الحدّ / الحدود» بقلم هاجر بودن
هي ورشة تقترحْها جمعية نشاز على الشّبان والشابّات المغرومين بالكتيبة الأدبية.
كيما قال كافكا، الأدب في حدّ ذاتُه فيه تكسير ـ ولّا على الأقلّ محاولة تكسير ـ للحدود بأنواعها.
وننجّمو نزيدو الّي الأدب عالم بكلّو أسرار، والّي الكتيبة الأدبية، مهما كانت، فيها استكشاف لأُمور بين البينين : بين الداخل والخارج، بين القريب والبعيد، بين الُمْمكن والمستحيل وغيرُه وغيرُه.
المناطق الحدودية بيدها، بالمفهوم الجغرافي والسياسي، مش ديما واضحة وثابتة، تنجّم تتحلّ وتتسكّر، تنجّم تكون خْلا مُخلي وتنجّم تقوم عليها حروبات، تفرّق بين الجيران وتقرّبهم من بعضهم. معناها الحدود ديما منهم حاجز ومنهم نقطة التقاء، الشّيْ الي يخلّيهم ديما مربوطتين بالعسّة من شيرة وبالسرّية من شيرة أخرى.
والمعنى ينجّم يكون مجازي ويعبّر على برشا تجارب يعيشها الإنسان بينُه وبين روحُه، في علاقتُه بغيرُه وبالعالم: الحلم والحبّ والسّفر والرّياضة والفنّ، مثلا، بْكُلّها تجارب تْخلّيه يواجه نوع مالحدود، يقبلها ولّا يحاول يوسّعها، على كلّ حال يشوف كيفاش ينجّم يتعامل معاها.
حتّى في اللُّغة، كلمة « حدّ » كلمة نستعملوها ديما : فلان أكا حدُّه، وفلان فاهم ـ ولّا موش فاهم ـ حْدودُه، وفلان وقّف فلتان عند حدُّه، و »حدّك حدّ المسقّي» ، و «للصّبر حدود» ، و «حدّ الله بيني وبينك »…
المطلوب من الي يحبّ يشارك في الورشة هو إنُّه يكتب، انطلاقا من بعض المعاني الي توحيلُه بيها هدرة الحدّ والحدود، نصّ أدبي مهما كان الشكل الي يختارُه : شعر، نثر، قصيدة، قصّة قصيرة، مشهد من مسرحية… المهمّ نصّ أدبي يبعثُه للمنشّطين متع الورشة الي باش يختارو، من بين النصوص الي وصلتهم، نصوص يخدمو عليهم مع الأولاد والبنات الي كتبوهم : يناقشوهم معاهم ومع المشاركين الأُخرين ويشوفو كيفاش ينجّمو يطوّروهم.
النّصوص ينجّمو يكونو مكتوبين بالدارجة ولّا بالفصحى ولّا بالفرنساوية. المشاركين ماهمش باش يكونو مفرّقين حسب اللّغة : المسائل الأدبية هي بيدها الي تتطرح على الكاتب مهما كانت لوغتُه. من شيرة أخرى، اللُّغات تاخذ وتتسلّف من بعضها ـ كيما الي صاير كلّ يوم في بلادنا ـ وماذا بينا نحاولو، مع بعضنا، نفهمو شويّة واقعنا اللّغوي في علاقتُه بالكتيبة الأدبية.
الورشة باش تدور فعالياتها من نهار 29 أكتوبر الى نهار 1 نوفمبرفي قهوة مسرح الشمال في تاجروين. عْمُر المشاركين لازمو يكون بين 16 و 25 سْنا. الي عمرهم أقلّ من 18 لازمهم يكونو من سكّان تاجروين والبقية ينجّمو يجيو من كامل تراب الجمهورية وتتكفل جمعية نشاز بمصاريف النقل. الي عمرهم يفوت الـ18 سُكْنتهم مضمونة في مسرح الشّمال في تاجروين.
بخلاف الورشة هاذي، نقترحو نشاطات أخرى: عرض زوز أفلام عندها علاقة بمسألة الحدود ـ ولقاء مع الكاتب زين العابدين بن عيسى وسهرة سلام.
الترشحات والنصوص يلزمها تتبعث للعنوان الالكتروني متاع جمعية نشاز من هنا لنهار 10 أكتوبر
جذاذات الترسيم تلقاوها في صفحة الحدث على الفيسبوك وعلى صفحة الجمعية
https://www.facebook.com/events/517969761688664/
https://www.facebook.com/Nachaz-Dissonances-445148138994585/timeline/?ref=hl